Facebook-ը պահպանում է ջնջված տվյալները

Հնարավոր է, որ Facebook սոցիալական ցանցը ստիպված լինի վճարել  100 հազար եվրոյի տուգանք, քանի որ պահպանել է այն անձնական տվյալները, որոնք օգտատերերը ջնջում են իրենց էջերից. գրում է The Guardian-ը:

Սոցցանցի գործունեությունը ստուգում է տվյալների պաշտպանության գծով լիազորված մարմինը: Դրա համար հիմք է ծառայել 22 բողոք, որոնք ստացվել են իրավաբանական ֆակուլտետի ուսանող ավստրիացի Մաքս Շրեմսից:

Նա հայտնաբերել է, որ սոցցանցը պահպանում է իր անձնական տվյալների ավելի քան հազար էջ, որոնց հիմնական մասն ինքը ջնջել էր: Հունիսին Շերմսը ներկա է եղել Facebook-ի ղեկավարներից մեկի դասախոսությանը եւ խնդրել կրիչի միջոցով իրեն փոխանցել իր անձնական տվյալները:

Երիտասարդը պարզապես շոկի մեջ է ընկել, երբ Կալիֆոռնիայից ստացել է իր տվյալներով սկավառակը. դրանում հավաքված են եղել սոցցանցում իր երեք տարիների բոլոր գործողությունները: Սկավառակը ստանալուց հետո Շրեմսը 22 բողոք է ներկայացրել, որոնք ուսումնասիրվելու են հաջորդ շաբաթ Իռլանդիայում, քանի որ այնտեղ է գտնվում Facebook-ի եվրոպական մասնաճյուղը:

Իսկ տվյալների պաշտպանության գծով լիազորված մարմնի մամուլի խոսնակը նշել է, որ եթե սոցցանցի մեղավորությունը հաստատվի, ապա այն մինչեւ 100 հազար եվրոյի տուգանք կվճարի: