Նիկոլ Փաշինյանը` լկտի

ՀԱԿ-ի հանրահավաքների ամենաուշագրավ թեման ինչպես մամուլի, այնպես էլ ընդդիմության ու իշխանության համար շարունակում է մնալ զուգարանների հարցը:

Նախ` ԱԺ ՀՀԿ խմբակցության ղեկավար Գալուստ Սահակյանը ՀԱԿ-ին առաջարկեց, որ «գարշոկներ» օգտագործեն, հետո էլ Նիկոլ Փաշինյանը, ընդունելով Սահակյանի «կառուցողական» առաջարկությունը, հայտարարեց, թե «Գալուստ Սահակյանը, գարշոկ բաժանելուց բացի, իր հետ թող բերի Հանրապետական պատգամավորներին, որ դրանք ժամանակին դատարկեն ու հետ բերեն»:

yerkir.am-ի հետ զրույցում, անդրադառնալով Փաշինյանի այս հայտարարությանը, Հանրապետական Գալուստ Սահակյանը դա անվանեց «լկտի վերաբերմունք»:

«Աշխարհով մեկ չի կարելի խայտառակել մի մեծ ազգի եւ հանրահավաքում քննարկել զուգարանների հարցը: Մարդիկ հանրահավաքին մասնակցում են մի երկու ժամ, եւ չեմ կարծում, որ նրանց զուգարան է անհրաժեշտ: Զուգարանները իրականում պետք են ՀԱԿ-ին, եւ թող իրենք էլ մտածեն»,- նշեց նա:

Չնայած զուգարանների խնդրին` Սահակյանը եւս մեկ անգամ վստահեցրեց, որ միշտ պատրաստ են երկխոսության: Մեր այն դիտարկմանը, թե իր գործընկեր Արտակ Զաքարյանը վստահ է, որ ՀԱԿ-ը չի կարող չարաշահել իշխանության պատրաստակամությունը, նա պատասխանեց. «Քաղաքական դաշտում երկխոսությունը ուլտիմատումով չի կայանում»: Երկխոսությունն, ըստ Գ. Սահակյանի, կարող է շարունակվել «միայն քաղաքակիրթ տարբերակով` առանց պահանջների»: