Իշխանությունը համաձայնելու ձեւը կգտնի...

ՀԱԿ-իշխանություն երկխոսության առանձնահատկությունը` պարտվում է նա, ով առաջինն է սխալվում. Yerkir.am-ի հետ զրույցում ասաց ԱԺ ՀՅԴ խմբակցության ղեկավար Վահան Հովհաննեսյանը` նշելով, որ առաջինը սխալվեց ՀԱԿ-ը:

Դաշնակցական գործիչն առավել քան համոզված է, որ ՀԱԿ-ն էլ է սա հասկացել, որ, «բոլորովին աննշան առիթով դադարեցնելով իշխանության հետ բանակցությունները, տակտիկական սխալ են թույլ տվել»:

«ՀԱԿ-ը ծուղակն ընկավ, էլ ում ասես քաղբանտարկյալ չհայտարեց… Սակայն, հասկանալով սխալը, որոշեց վերադառնալ, բայց ոչ խնդրողի, այլ` պահանջողի դիրքերից, դրա համար էլ հրապարակում վրաններ, ամպագոռգոռ հայտարարություններ…»,- նշեց Վահան Հովհաննեսյանը:

Խորհրդարանական ընդդիմության ներկայացուցիչը համոզված է, որ իշխանությունը երկխոսությունը շարունակելու ՀԱԿ-ի առաջարկին կհամաձայնի, «բայց քանի որ ՀԱԿ-ը կոշտ դիրքերից է խոսում, իշխանությունն էլ իր դիրքերը կկոշտացնի»: «Այդուհանդերձ, իրենք իրենց համար համաձայնելու մի ձեւ կգտնեն»,- համոզված է Վահան Հովհաննեսյանը:

Դաշնակցական գործիչը կանխատեսումներ չի ցանկանում անել, քանի որ չի հավատում ո'չ արտահերթ ընտրություններ «պահանջողներին», ո'չ էլ դրանց անցկացման հավանականությունը: