Մետրոյի հարեւանությամբ հյուրանոց չի կառուցվի

«Թրանսփարենսի Ինթերնեյշնլ» հակակոռուպցիոն կենտրոնը կազմակերպել էր մայրաքաղաքի գլխավոր հատակագծի ճշգրտման նախագծի հասարակական քննարկում, որին մասնակցում էին հասարակական ու միջազգային կազմակերպությունների, ՀՀ տարբեր գերատեսչությունների ներկայացուցիչներ եւ անկախ փորձագետներ:

Ինչպես նշված էր օրակարգում, քննարկմանը պետք է մասնակցեր նաեւ Երեւանի գլխավոր ճարտարապետ Նարեկ Սարգսյանը, սակայն կենտրոնի ղեկավար Սոնա Այվազյանն ասաց, թե «ավելի կարեւոր միջոցառումներ ունենալու պատճառաբանությամբ» Երեւանի գլխավոր ճարտարապետը չի ներկայացել քննարկմանը:

Քննարկմանը մասնակցում էին քաղաքապետարանի քաղաքաշինության ու տրանսպորտի եւ ճարտարապետության վարչությունների պետերը:

«Գլխավոր հատակագծում էական փոփոխություններ չեն եղել, այն քաղաքի տնտեսական զարգացման  տարածական պլանավորումն է»,- ասաց «Երեւաննախագիծ ինստիտուտ» ՓԲԸ-ի գործադիր տնօրեն Սիրեկան Օհանյանը:

Նա հավելեց, որ հատակագծում տեղ են գտել տրանսպորտային երթուղիների, քաղաքի հողային ռեսուրսների, կանաչ տարածքների փոփոխություններ, ինչպես նաեւ ճանապարհափողոցային նոր սխեմաներ:

Լրագրողների հետ զրույցում Ս. Օհանյանը նշեց նաեւ, որ մետրոյի «Հանրապետության հրապարակ» կայարանի հարեւանությամբ հյուրանոց կառուցելու խնդիրը դուրս է մնացել  հատակագծի մշակման շրջանակներից:

Ճշգրտման աշխատանքները ցույց են տվել, որ գլխավոր հատակագծի մշակման ու իրացման համակարգը կատարելագործման անհրաժեշտության ունի: Գլխավոր հատակագծի ճշգրտումները կատարվել էին անցած 6 տարիների համար: Քննարկման արդյունքները կամփոփվեն եւ առաջարկները կներկայացվեն «Երևաննախագիծ» ինստիտուտին:

Տաթեւիկ ԲԱՂԴԱՍԱՐՅԱՆ