Անկախության զորահանդես եւ շքերթ (լուսանկարներ)

Հայաստանի գլխավոր հրապարակում սկսվել է Անկախության 20-ամյակին նվիրված զորահանդեսը:

Դեռ ժամը 10-ից զորահանդեսին մասնակցող տեխնիկան եւ անձնակազմը կենտրոնացել էին Հանրապետության հրապարակին հարող Նալբանդյան, Աբովյան, Ամիրյան եւ Վազգեն Սարգսյան փողոցներում: Հազարավոր քաղաքացիներ դեռ առավոտից տեղեր են զբաղվեցրել փողոցներ ու հրապարակի երկայնքով` անկախության զորահանդեսը եւ շքերթը դիտելու համար:

Զորահանդեսի հրամանատար, Հայաստանի ԶՈւ Գլխավոր շտաբի պետ Յուրի Խաչատուրովն անձնակազմի ստուգատես անցկացնելուց հետո զորահանդեսի մեկնարկը տվեց:  Զորահանդեսն ընդունեց եւ մասնակիցներին ողջունի խոսք ասաց պաշտպանության նախարար Սերյան Օհանյանը, ապա զեկուցեց ՀՀ նախագահ Սերժ Սարգսյանին, որ զորքերը պատրաստ են զորահանդեսի:

ՀՀ նախագահի խոսքով` երկու տասնամյակներում Հայաստանին հաջողվել է հսկայական թռիչք արձանագրել, բայց դեռ կան  շատ անելիքներ: «Ե՛վ ձեռքբերումները, և՛ բացթողումները մերն են: Այդ գիտակցությամբ հաջորդ 20 տարիներին ի զորու ենք կառուցելու մի երկիր, որ մոտ է լինելու մեր իդելաներին, քանի որ ես հավատում եմ մեր հավաքական ուժին»,- ասաց նախագահ Սարգսյանը:

Ըստ ՀՀ նախագահի` սա հազարամյակների լրջագույն պատմություն ունեցող, բայց 20 տարեկան Հայաստանն է` 20 տարեկանի ավյունով, լավատեսությամբ ու համարձակ ծրագրերով, բայց ոչ՝ 20 տարեկանի միամիտությամբ: Սա նոր Հայաստանն է, որին այլևս անհնար է խաբել, պարտադրել կամ շանտաժի ենթարկել, նրա հետ հնարավոր է բարեկամանալ և համագործակցել, օրինակ ծառայել և օրինակ վերցնել. սա նոր Հայաստանն է, որ հիշում է շատ բան, բայց հիշաչար չէ, տեսել է շատ բան, բայց հայացքն ուղղել է ապագային:

«Այս զորահանդեսը հայության հավերժական երթի լուսավոր դրվագ է: Հայաստանի Հանրապետությունը 20 տարեկան է, փա՜ռք Հայաստանի Հանրապետությանը, փա՜ռք Հայաստանի զինված ուժերին: Ուռա՜»,- զորահանդեսի բացումն ազդարերեց նախագահը:

Այնուհետեւ հնչեց Հայաստանի օրհներգը, որից հետո ԶՈւ գլխավոր շտաբի պետ Յուրի Խաչատուրովը զինուժը կոչեց հանդիսավոր երթի:

Փոխգնդապետ Հարություն Զաքարյանի գլխավորությամբ` անցավ ուսումնական Լ-39 ինքնաթիռների խումբը: Ի դեպ, այս ինքնաթիռներով իրականացվում է երիտասարդ օդաչուների պատրաստման գործընթացը:

Օդային շարունակեցին ուղղաթիռները: Մի-24 մարտական ուղղաթիռների խումբը գլխավորում էր 1-ին կարգի օդաչու, Մարտական ծառայության մեդալի ասպետ, գնդապետ Սամվել Սիանոսյանը: Մի-8 ռազմատրանսպորտային մարտական ուղղաթիռները մասնակցում էին` փոխգնդապետ Սերգեյ Հարությունովի ուղեկցությամբ: Օդային շքերթի ավարտն ազդարարեցին Մի-2 ուղղաթիռները` փոխգնդապետ Արթուր Հակոբյանի գլխավորությամբ: