20 մլն դրամի տուգանք` դեմպինգ իրականացնելու համար

Լուծվող սուրճի ներկրման ոլորտում խոշոր ծավալներ ունեցող «Մոկոնաթ» ընկերությունը տուգանվել է  20 միլիոն դրամով` դեմպինգ իրականացնելու համար:

Ինչպես հայտնում է Տնտեսական մրցակցության պաշտպանության պետական hանձնաժողովի մամուլի ծառայությունը, իրենց ուսումնասիրությունների արդյունքում բացահայտվել է, որ այս ընկերությունը տեւական ժամանակ լուծվող սուրճն իրացրել է խիստ տարբերակված գներով, իսկ որոշ դեպքերում էլ անհիմն կերպով բարձրացրել է գինը:

Հանձնաժողովը պարզել է նաեւ, որ մի որոշ ժամանակահատված «Մոկոնաթը» գների կտրուկ իջեցման միջոցով փորձել է շուկայից դուրս մղել իր մրցակիցներին, այսինքն` ընկերությունը իրականացրել է դեմպինգ, ինչի արդյունքում էլ լուծվող սուրճի շուկայում կարողացել է զբաղեցնել գերիշխող դիրք՝ ներկրման ծավալներով դառնալով առաջատար:

Համաձայն ընկերության կողմից հանձնաժողովին ներկայացված փաստաթղթերի` լուծվող սուրճի ձեռքբերման գինը կազմել է  820 դրամ, սակայն վաճառքը տեղի է ունեցել գնման գնից անհամեմատ ցածր արժեքով՝ 620 դրամով: Այս գործելաոճով շուկայում առաջատար դիրքերի հասնելով` ընկերությունը կտրուկ փոխել է իր վարքագիծը եւ վարել հակառակ քաղաքականությունը. նույն 820 դրամով ձեռք բերված սուրճը վաճառել է քառակի անգամ թանկ՝ 3300 դրամով:

Փաստաթղթերի ուսումնասիրությունից պարզ է դառնում, որ լուծվող սուրճի շուկայում գերիշխող դիրք ունեցող ընկերությունը տեւական ժամանակ գործել է օրենքի ակնհայտ խախտումներով եւ գերշահույթներ կորզել սպառողներից:

Ի դեպ, պարզվել է նաեւ, որ ապրանքի ձեռքբերման եւ վաճառքի գները ակնհայտորեն չեն համապատասխանում իրական շուկայական գներին, ինչի հետ կապված բոլոր նյութերն ուղարկվել են Պետական եկամուտների կոմիտե:

«Մոկոնաթ» ընկերությունը  խոշոր ներկրող է նաև հետևյալ ապրանքային շուկաներում՝  սառեցրած ձկներ, ներկրվող սառեցված միս եւ բրինձ: