Ադրբեջանցի սպաները պատրաստվում են բոյկոտի

Հերթական սկանդալն է հասունանում Ադրբեջանի զինված ուժերում:

Ադրբեջանական ընդդիմադիր «Ենի Մուսավաթ» թերթը հրապարակել է Ադրբեջանի Բարձրագույն ռազմական ակադեմիայի սաների ստորագրությամբ մի նամակ, որում նշվում է ադրբեջանական բանակում տեղի ունեցող օրինախախտումների, այդ թվում՝ մեծ չափերի հասնող կաշառակերության դեպքերի, ինչպես նաև Ռազմական ակադեմիայում ադրբեջանցի թյուրքերի դեմ իրականացվող ճնշումների մասին։

Ընդգծելով, որ բոլոր այդ օրինախախտումների համար պատասխանատվություն է կրում Ադրբեջանի պաշտպանության նախարար, լեզգիական ծագում ունեցող Սաֆար Աբիևը, ապագա սպաները գրում են, որ թեեւ Ադրբեջանի բնակչության 92%-ն ունի թյուրքական ծագում, պաշտպանության նախարարության աշխատակիցների 90%-ը թաթարներ և լեզգիներ են, սակայն ռազմական ակադեմիայում մեծ ճնշումներ են իրականացվում թյուրքական ծագում ունեցող ադրբեջանցիների նկատմամբ:

«Այդ ճնշումների համար պատասխանատվություն է կրում ակադեմիայի հրամանատար Ջենգիզ Սաֆիևը։ Եվ քանի դեռ նրան պաշտոնանկ չեն արել, մենք ոտք չենք դնի Ռազմական ակադեմիա»,- նշվում է նամակում։

Ի դեպ, Ադրբեջանի պաշտպանության նախարարությունը շատ կոշտ քննադատության է ենթարկել այս նամակը:

«Դուք նման ձևով թեմա եք տալիս թշնամի հայկական մամուլին, թուլացնում եք ադրբեջանական բանակը։ Այդ պնդումներն անհիմն են»,- հայտարարել է Ադրբեջանի ՊՆ-ն։