Արցախյան բանակցային գործընթացը կակտիվանա

Ղարաբաղյան կարգավորման բանակցային գործընթացը կակտիվանա` կապված է տարածաշրջանում Եվրամիության նոր հատուկ ներկայացուցիչ նշանակելու հետ. այսօր լրագրողների հետ հանդիպման ժամանակ նշեց Հայաստանում Լեհաստանի արտակարգ եւ լիազոր դեսպան Զդիսլավ Ռաչինսկին:

«Ինչպես գիտեք, Հարավային Կովկասում ԵՄ հատուկ ներկայացուցչի գործառույթների մեջ մտնում է նաեւ հակամարտությունների կարգավորումը: Չեմ ցանկանում Արցախյան հակամարտությունն անվանել սառեցված, երբ այնտեղ մարդիկ են զոհվում: Ինձ չի թվում, որ բանակցությունների ձեւաչափը մոտ ապագայում կփոխվի, բայց որ այն կակտիվանա, ես վստահ եմ»,- ասաց նա:

Դեսպանը նաեւ կարծիք հայտնեց, որ մինչ այժմ հակամարտության բանակցային գործընթացում ԵՄ-ն ակտիվ չի եղել. «Ֆրանսիան իրավասու չէ ԵԱՀԿ Մինսկի խմբում ներկայացնել Եվրամիության դիրքորոշումը, սակայն հասկանալի է, որ, ներկայացնելով իր դիրքորոշումը, Ֆրանսիան ներկայացնում է նաեւ ԵՄ տեսակետը»:

Ըստ դեսպանի` թեեւ ԵՄ-ն ուղղակիորեն մասնակցություն չունի Արցախյան գործընթացին, սակայն դա չի էլ նշանակում, թե Ռուսաստանն ավելի դոմինանտ դեր ունի, քան մյուս անդամները: