Հայազգի պատանուն դանակահարելու համար Կրասնոդարում քրեական գործ է հարուցվել

ՌԴ Կրասնոդարի երկրամասում հարուցվել է քրեական գործ հայազգի պատանու առողջությանը տեղաբնակների կողմից կանխամտածված ծանր վնաս պատճառելու գործով. տեղեկացնում է «Երկրամասը»:

Խոսքը Ռուսաստանի 16-ամյա քաղաքացի Բագրատ Ասատրյանի մասին է, որի վրա 2010-ի դեկտեմբերի 13-ին հարձակում էր գործել 18-ամյա Ալեքսանդր Պոտյոմինը:

Մոսկվայում ֆուտբոլային ֆանատի սպանությունից հետո նա իր 18-20 տարեկան ծանոթներին, նաեւ դեռեւս չբացահայտված այլ անձանց առաջարկում է հարձակվել ոչ սլավոնական արտաքինով մարդկանց վրա ու ծեծի ենթարկել նրանց: Համաձայնություն ստանալով` Պոտյոմինն իր համախոհներին բաժանում է բժշկական դիմակներ` հանցագործության ժամանակ դեմքը ծածկելու համար:

2010-ի դեկտեմբերի 13-ին հանցագործները տեսնում են երկու անցորդի, որնցից մեկը հայ է լինում: Հետեւելով նրանց` տներից մեկի բակում նրանք հարձակվում են տղաների վրա` բեյսբոլի մահակով հարվածներ հասցնելով: Երբ տուժածներից մեկն ասում է, որ ինքը ռուս է, հարձակվողները դադարում են նրան ծեծել: Հետաքննությունը պարզել է, որ հարձակվողներին ավելի ուշ միացել է Ալեքսանդր Պոտյոմինը եւ դանակով 13 անգամ հարվածել հայ տղային:

Բագրատ Ասատրյանին հաջողվել է փրկել, իսկ հանցագործը, ի դեպ, ներկայումս բուժվում է հոգեբուժարանում: