Սթրոս Կանի դեմ մեղադրանքը հավանորեն կհանվի

Արժույթի միջազգային հիմնադրամի նախկին ղեկավար Դոմինիկ Սթրոս Կանի` նյույորքյան Sofitel հյուրանոցի սպասուհի Նաֆիսատու Դիալոյին բռնաբարելու գործով հետապնդումը կարող է դադարեցվել. վկայակոչելով Մանհեթենի դատախազության աղբյուրը` տեղեկացնում է New York Post-ը:

Ըստ թերթի` օգոստոսի 23-ին հերթական դատավարության ժամանակ շրջանային դատախազությունը հավանորեն հանդես կգա Սթրոս Կանի դեմ մեղադրանքը հանելու միջնորդությամբ, քանի որ այն ապացուցել հնարավոր չէ միակ վկայի` տուժած սպասուհու` վստահություն չներշնչող ցուցմունքների պատճառով: Միջնորդության մեջ ներկայացվելու են նաեւ գործի` դեռեւս չհրապարակված մանրամասները, որոնք նոր հարցեր են առաջացնում սպասուհու ցուցմունքների կապակցությամբ. գործի հետաքննության ընթացքում Նաֆիսատու Դիալոն բազմիցս ստել է ոստիկանությանը եւ դատարանում:

Նման միջնորդությունները շատ հազվադեպ են լինում ամերիկյան դատավարության պրակտիկայում եւ, որպես կանոն, բավարարվում են դատավորների կողմից, հետեւաբար Դոմինիկ Սթրոս Կանը, հավանորեն, շուտով Ֆրանսիա կվերադառնա: