Եկեղեցուն ժողովրդի օգնությունն է հարկավոր

Հայաստանում այսօր կան 67 գրանցված կրոնական կազմակերպություններ. այսօր լրագրողների հետ «Աղանդավորները եւ Հայաստանում աղանդների գործունեության հետեւանքները» թեմայով զրույցի ժամանակ տեղեկացրեց «Քայքայիչ աղանդներից տուժածների օգնության կենտրոն» ՀԿ-ի ղեկավար Ալեքսանդր Ամարյանը:

Ըստ նրա` այդ կազմակերպություններից 10-ը պատկանում են Հայ Առաքելական եկեղեցուն, 6-ը` ավանդական եկեղեցիներին` կաթոլիկներ, ուղղափառներ, իսկ մնացածը նոր կրոնական կառույցներ են` աղանդները:

Իսկ Սբ Հովհաննես եկեղեցու քահանա Տեր Շմավոնը հավելեց, որ Հայ Առաքելական եկեղեցուն կից կազմակերպությունները աղանդավորական չեն համարվում, քանի որ եկեղեցու գաղափարախոսության կրողներն են:

Ա.Ամարյանը նշեց, որ 5 տարվա ընթացքում կարողացել են ամենաշատը 15 մարդու ճիշտ ուղու վրա կանգնեցնել, քանի որ 1 մարդուն «բուժելու» համար հարկավոր է 2-7 տարի և մեծ ֆինանսներ, որոնք իրենք չունեն:

«Վերջերս մի նոր կրոնական կազմակերպություն է հայտնվել «Աթա Այաթ», որն իբր  ինքնահրկիզմամբ բուժում է մարդկանց: Այս կազմակերպությունը ծնունդ է առել Ղազախստանում»,- նշեց բանախոսը եւ հավելեց, որ մոտավոր հաշվարկներով աղանդավորական կազմակերպությունները տարեկան 1 միլիոն դոլար եկամուտ են ստանում: