Ադրբեջանցի աղջկա մահը վաղ է որպես սպանություն կամ ահաբեկչություն որակել. ՌԴ ԱԳՆ

Ռուսաստանի արտգործնախարար Սերգեյ Լավրովը համարում է, որ դեռ վաղ է ադրբեջանցի աղջկա մահը որպես սպանություն կամ ահաբեկչական գործողություն որակել:

Ինչպես տեղեկացնում է ԻՏԱՌ-ՏԱՍՍ-ը, պատասխանելով Հայաստանի հետ սահմանակից ադրբեջանական Ալիբեյլի գյուղում հուլիսի 15-ին 12-ամյա աղջկա մահվան վերաբերյալ հարցին, նա ասել է. «Որքան ինձ հայտնի է ադրբեջանական իշխանությունները քրեական գործ են հարուցել «Սպանություն» հոդվածով, սակայն այդ գործողությունը սպանություն, ահաբեկչական գործողություն որակելու համար հարկավոր է սպասել դատարանի որոշմանը: Մենք շահագրգռված ենք, որ մեզ տեղյակ պահեն հետաքննության ընթացքի մասին: Տեղեկությունների համաձայն` խոսքը Պետերբուրգի բնակիչների մասին է»:

Հիշեցնենք, որ ադրբեջանական ԶԼՄ-ների համաձայն` 12-ամյա Այգուն Շահմալիեւան, որը ադրբեջանական գյուղում հանգստանում էր հարազատների մոտ, մահացել է խաղալիքում տեղադրված պայթուցիկի պայթյունից: Նրա մայրը վիրավորվել է: Ադրբեջանն անմիջապես մեղավոր է հայտարարել Հայաստանին: