Ադրբեջանցի սպայի անկեղծ խոստովանությունը

«Բանակում այնպիսի իրադրություն է ստեղծվել, որ զինվորները չեն կարող հայրենասեր լինել»,- ադրբեջանական «Բիզիմ յոլ» թերթի թղթակցի հետ զրույցում հայտարարել է Ադրբեջանի Բեյլեգան շրջանում տեղակայված զորամասի կապիտան Հասիմովը։

Հասիմովը եւ նրա ծառայակիցները «Բիզիմ յոլ»-ի թղթակցին բազում ուշագրավ տեղեկություններ են հաղորդել զորամասում առկա խնդիրների, խարդախությունների եւ կաշառակերության մասին։

Ըստ նրանց` զորամասը քարուքանդ վիճակում է եւ լուրջ վերանորոգման կարիք ունի: Վերանորոգման պատրվակով զորամասի հրամանատարությունը ապօրինաբար յուրացնում է զինծառայողների աշխատավարձը` ծախսելով այն շինանյութերի ձեռքբերման համար:

«Ես չեմ կարողանում ապահովել իմ եւ ընտանիքիս պահանջները: Թերթի միջոցով դիմում եմ Գերագույն հրամանատար Իլհամ Ալիեւին` ես կանգնած եմ թշնամուն դեմ հանդիման, պաշտպանում եմ հայրենիքս, սակայն դրա դիմաց ստացած աշխատավարձիս քարտը շինարարական խանութում եմ թողնում»,- ասել է Հասիմովը: