Շտապօգնության բժշկին սպանողին բերման են ենթարկել (ֆոտոռեպորտաժ, տեսանյութ)

Գյումրիում շտապօգնության բժշկին սպանողին բերման են ենթարկել ոստիկանության Գյումրիի բաժին:  

Ինչպես հայտում է ֆոտոլրագրող Գագիկ Շամշյանը, ոստիկանության Գյումրիի բաժին հունիսի 26-ին` ժամը 23.30-ի սահմաններում, ահազանգ է ստացվել շտապօգնության կայանից, որ թիվ 10 բրիգադը կանչով մեկնել է Գյումրի քաղաքի Կոմինտերնի փողոցի 2-րդ նրբանցքի 13 տուն, որտեղ նշված հասցեի բնակիչները վիճաբանել են շտապօգնության աշխատակիցների հետ:

Դեպքի վայր ժամանած Գյումրիի ոստիկանության օպերատիվ խումբը նշված հասցեում հայտնաբերել է թիվ 10 բրիգադի բժիշկ, վիրաբույժ, Արթիկ քաղաքի բնակիչ 65-ամյա Աշոտ Գրիգորյանի դին:

Օպերատիվ քննչական խումբը պարզել է, որ  Աշոտ Գրիգորյանին ծեծի է ենթարկել 28-ամյա Արտակ Կարապետյանը, ով աշխատում է Գյումրիի «Մուշ-2» թաղամասի «Գլենդել Հիլզ» թաղամասում:

Դեպքի վայրում հարեւանները պատմել են, որ Արտակի հայրը վատ է զգացել, այդ պատճառով շտապ բուժօգնություն են կանչել: Շտապօգնության բրիգադը մի քանի րոպե ուշացել է, ինչն էլ զայրացրել է ոչ սթափ վիճակում գտնվող Արտակին: Վերջինս սկզբում տանը ծեծի է ենթարկել բժշկին, իսկ երբ բժիշկը օգնություն է ցուցաբերել հիվանդին` նրան դեղ ներարկելով եւ իջել բակ, Արտակը շարունակել է ծեծի ենթարկել բժիշկին, որը  հենց մուտքի մոտ մահացել է:

Ծեծին ներկա են եղել բուժքույր Լամարա Հարությունյանը եւ շտապօգնության վարորդը:

Քանի որ դատական բժիշկը ոստիկանությանը հայտնել է, որ, ըստ նախնական տեղեկությունների, բժշկի մարմնի եւ գլխի հատվածներում առկա են եղել բռնության հետքեր, ուստի օպերատիվ քննչական խումբը, որպես կասկածյալ, ոստիկանության Գյումրիի բաժնի 2-րդ բաժանմունք բերման է ենթարկել 28-ամյա Արտակ Կարապետյանին, սակայն նա դեռ չի ձերբակալվել:

Ոստիկանության Շիրակի մարզի քննչական բաժնում փաստի առթիվ նյութեր են նախապատրաստվում:

լուսանկարները` Գագիկ Շամշյանի

Այս մասին տեսանյութը կարող եք դիտել  այստեղ: