Տիմոշենկոյի դեմ դատը սկսվել է ծեծկռտուքով

Այսօր սկսվել է Ուկրաինայի նախկին վարչապետ, «Բատկիվշչինա» կուսակցության առաջնորդ Յուլյա Տիմոշեմկոյի դեմ դատավարությունը: Նրան մեղադրում են Ռուսաստանի հետ 2009-ին գազի մատակարարման վերաբերյալ պայմանագրեր կնքելիս իշխանությունը եւ ծառայողական լիազորությունները գերազանցելու մեջ:

Դատարանի մոտ հավաքվել են Տիմոշենկոյի հարյուրավոր կողմնակիցներ` «Ոչ քաղաքական տեռորին», «Ազատություն քաղբանտարկյալներին» եւ այլ կարգախոսներով պաստառներով, նաեւ` նրա հակառակորդները: Նրանց միջեւ բախում է եղել. տեղեկացնում է ТСН-ն:

Միջադեպը սկսվել է այն բանից, որ լրագրողներին է մոտեցել նախկին պատգամավոր Օլեգ Կալաշնիկովը` ներկայացնելու իր կարծիքը դատավարության վերաբերյալ: Նա հայտարարել է, որ «իր կոռուպցիոն գործունեության համար Տիմոշենկոն պետք է նստի բանտում»: Նախկին վարչապետի կողմնակիցները, «ամոթ» բացականչելով, հարձակվել են նախկին պատգամավորի վրա, եւ նրանց ու Տիմոշենկոյի հակառակորդների միջեւ ծեծկռտուք է սկսվել: