Հայ ֆուտբոլիստը կմեկնի Բաքու

Բելառուսական «Մինսկի» հայազգի կիսապաշտպան Անդրեյ Խաչատուրյանը հարցազրույց է տվել ադրբեջանական azerisport.com կայքին:

Պատճառն այն է, որ Եվրոպայի լիգայի որակավորման փուլում «Մինսկը» հանդիպելու է ադրբեջանական «Ազալ» ակումբի հետ:

Սկզբում խոսվել է երկու թիմերի մասին: Խաչատուրյանը չի ցանկացել որոշել խաղի ֆավորիտին` պատասխանելով, որ երկու թիմերն էլ քիչ տեղեկություն ունեն միմյանց մասին: Այնուհետև նա ներկայացրել է իր տեղեկությունները ադրբեջանական ֆուտբոլի մակարդակի և թիմերի վերաբերյալ:

Վերջում ադրբեջանցի լրագրողը հարցրել է, թե Խաչատուրյանը պատրաստվո՞ւմ է մեկնել Բաքու` հաշվի առնելով Հայաստանի և Ադրբեջանի հարաբերությունները:

Ֆուտբոլիստը պատասխանել է. «Ես ոչ մի խնդիր չունեմ, քաղաքականությամբ թող զբաղվեն քաղաքագետները: Ես թշնամանք չունեմ ադրբեջանցիների հանդեպ: Մենք ֆուտբոլիստներ ենք և պետք է անենք մեր գործը: Ես մեծ սիրով կխաղամ Բաքվում: Հուսով եմ` ոչ մի քաղաքական հարց չի խանգարի ինձ»: