ՀԱՅԿԱԿԱՆ ԺԱՄԱՆԱԿ. Էկզոտիկա` ԱԺ-ում

Երեկ Ազգային Ժողովի արտահերթ նիստին մասնակցել են մի շարք պատգամավորներ, ովքեր ամիսներով, նույնիսկ տարիներով աշխատանքի չեն գնում` Լեւոն Սարգսյանը, Տիգրան Արզաքանցյանը, Սեյրան Սարոյանը եւ ուրիշներ:

ԱԺ երեկվա նիստը սկսվելուց անմիջապես հետո խորհրդարանում լուրեր են տարածվել, թե ԱԺ-ն անվստահություն է հայտնելու վարչապետին եւ նրա կաբինետին: Մի փոքր անց հանրապետական պատգամավոր Հակոբ Հակոբյանն իր ասուլիսում հայտարարել է, թե Սերժ Սարգսյանը պատրաստ է ցրել Ազգային ժողովը: Ավելի ուշ ՀՀԿ խմբակցության ղեկավար Գալուստ Սահակյանը մեր թղթակցին ասել է, թե կառավարության անվստահության հարց չի քննարկվելու, իսկ Հակոբ Հակոբյանը պնդել է, թե ինքը «պատրաստ է» բառը չի օգտագործել: «Ես ասում եմ, որ նախագահը կարող է օրենքով սահմանված կարգով ցրել ԱԺ-ն»,- մեր թղթակցին ասել է Հակոբ Հակոբյանը: