Ադրբեջանը սառը պատերազմ է վարում Հայաստանի եւ ԼՂՀ-ի դեմ

Բավական է անընդհատ ահաբեկված ման գանք, որ պատերազմ կսկսվի, որովհետեւ պարոն Ալիեւը խելքը հացի հետ չի կերել, որ վտանգի իր ահռելի ունեցվածքն ու բարեկեցությունը. անդրադառնալով պատերազմի վերսկսման հնարավորության մասին հարցին` այսօր լրագրողներին ասաց ՀԴԿ ղեկավար Արամ Սարգսյանը:

«Ոչ ոք չի կարող կանխագուշակել, թե պատերազմն ինչ հետեւանքներ կունենա հատկապես Ադրբեջանի համար»,- նշեց նա` կարծիք հայտնելով, որ հարեւան երկիրը սառը պատերազմ է վարում Հայաստանի եւ ԼՂ-ի դեմ:

«Նա ամեն կերպ ուզում է մեզ ներքաշել մրցավազքի մեջ, որպեսզի մենք անընդհատ փորձենք մեր ուժերն ու մեր միջոցները ներդնել ավելի շատ զենք ու զրահ գնելու մեջ: Բայց մենք չպետք է տուրք տանք այդ տրամադրություններին, այլ պետք է թույլ տանք, որ ինքը շարունակի դա անել»,- ասաց Արամ Սարգսյանը`հավելելով, որ մանեւրելու հնարավորությունները շատ են, որոնցից, սակայն, Հայաստանը չի օգտվում: