Կոչ` կաթողիկոսին

Ջավախահայերը դիմել են Գարեգին Բ Ամենայն Հայոց կաթողիկոսին Վրաստան կատարելիք այցի նախօրյակին` կոչ անելով Վրաստանում բարձրացնել ջավախահայ գործիչ Վահագն Չախալյանի հարցը:

«Մենք՝ ներքոստորագրյալներս, կոչ ենք անում Ձեզ Վրաստանի Հանրապետություն կատարելիք այցի ընթացքում Վրաց ուղղափառ եկեղեցու պատրիարք Իլյա Երկրորդի և Վրաստանի պետական այրերի հետ հանդիպման ժամանակ բարձրացնել ջավախքահայ ազգային, հասարակական և քաղաքական գործիչ, Վրաստանի Հանրապետությունում Հայ Առաքելական եկեղեցու, կրոնական և լեզվամշակութային արժեքների պահպանման գործընթացի պայքարի նվիրյալ, քաղբանտարկյալ Վահագն Չախալյանի նկատմամբ քաղաքական հետապնդման՝ ապօրինի ձերբակալության, դատավարության, բանտարկության թեման»,- մասնավորապես, ասված է ջավախահայերի հանրագրում:

Այսօր այդ փաստաթուղթը` 1200-ից ավելի ստորագրություններով,  փոխանցվել է Մայր Աթոռ Սուրբ Էջմիածնի դիվանատուն: