"Երկիրը" Արզաքանցյանին պետք է վճարի 280 հազար դրամ

Այսօր Կենտրոն եւ Նորք-Մարաշ համայնքների ընդհանուր իրավասության դատարանում հրապարակվել է ԱԺ պատգամավոր Տիգրան Արզաքանցյանի` «Երկիր» օրաթերթի դեմ հայցով վճիռը:

Դրա համաձայն` «Երկիր» օրաթերթը պետք է պատգամավորին վճարի 280 հազար դրամ, որից 200 հազարը Տ. Արզաքանցյանի մասին Հրանտ Բագրատյանի «լակոտ» արտահայտությունը տպագրելու (որն ի դեպ ժամանակին հերքվել էր օրաթերթի կողմից ներկայացնելով նույն` Բագրատյանի տված տեղեկանքը , որ ինքը Արզաքանցյանին լակոտ չի ասել), իսկ 80 հազարը դատական ծախսերը փոխհատուցելու համար:

Վճիռը բողոքարկելու վերաբերյալ վերջնական որոշում կընդունվի վճռին ավելի մանրամասն ծանոթանալուց հետո:

Հիշեցնենք, որ ԱԺ հանրապետական պատգամավորն  իր պատիվն ու արժանապատվությունը արատավորելու համար «Երկիր» օրաթերթից պահանջում էր 3 մլն դրամ, 568 հազար դրամ էլ` դատական և փաստաբանական ծախսերի համար: Պատգամավորին  հատկապես դուր չէր եկել այն, որ «Երկիր»-ն իր «131 դեմք ու դիմակ» խորագրի տակ գրել էր, թե Արզաքանցյանը ստիլյագ է, սիրում է  հաճախել կազինոներ, ծեծ ուտելու սովորություն ունի, գեղեցկուհիներ է տանում-բերում Հայաստան, տիրապետում է տարբեր լեզուների, բայց առավել հասկանալի խոսում է հայրենի քյավառա բարբառով: