Փոշեկուլներ կամ հեռուստացույցներ չեն խաղարկվելու

Այսօր երեկոյան` ժամը 18-ին, կմեկնարկի «Թանգարանային գիշեր» միջոցառումը, ինչը նշանակում է, որ Հայաստանի շուրջ 60 թանգարաններ դռները բաց` անհամբեր սպասելու են այցելուներին:

Այսօր, բացի ուշագրավ ու ինքնատիպ ցուցադրություններից, բոլոր թանգարաններն էլ միջոցառումներ են պատրաստել հյուրերի համար:

Ազգային պատկերասրահը, օրինակ, անդրադառնալու է տառերին, գրքերին, ցուցադրելու է Ռոբերտ Սահակյանցի մուլտֆիլմերը, իսկ, Հովհ. Թումանյանը տուն-թանգարանում, բացի համերգից եւ բեմադրությունից, ներկաներին հնարավորություն կտրվի դառնալու ինտերակտիվ խաղի մասնակից:

Սարյանի տուն-թանգարանը հրավիրում է ունկնդրել կամերային եւ վոկալ երաժշտություն, նաեւ լսել հետաքրքիր զեկույցներ եւ նույնիսկ դիտել փաստավավերագրական ֆիլմեր:

Թանգարանները ջանք ու եռանդ չեն խնայել ինչպես հարկն է մասնակցել միջոցառմանը եւ գոհացնել հյուրերին, բայց արդյո՞ք բոլորն են տեղյակ այս հիանալի միջոցառման մասին:

Հարցախույզ անցկացնելով, մասնավորապես, երիտասարդների շրջանում (շուրջ 70 մարդ)` պարզեցինք, որ մարդիկ կա'մ տեղյակ են` ինչպես հարկն է, կա'մ գաղափար անգամ չունեն, թե ինչի մասին է խոսքը:

«Էդ ինչ ա թանգարանային գիշերը. շաբաթօրյակի օր ա՞: Չէ, չգիտեմ` ինչի մասին է խոսքը»,- ասաց 24-ամյա Նարեկ Դանիելյանը եւ իմանալուց հետո անգամ անտարբեր ասաց. «Հա, մթոմ ինչ»:

Ի դեպ, նման մարդկանց թիվը այնքան էլ քիչ չէր (70 հարցվածից 48-ը):

Իսկ որոշ երիտասարդներ նույնիսկ քարտեզ էին գծել, թե որտեղից են սկսելու իրենց այցը եւ հերթականությամբ որ թանգարանն են այցելելու: «Կսկսենք Ժամանակակից արվեստի թանգարանից, հետո կգնանք Քոչարի, Չարենցի, Թումանյանի, Սարյանի, Կապուտիկյանի, Արամ Խաչատրյանի եւ վերջում Իսահակյանի տուն-թանգարան: Հուսով եմ` կհասցնենք»,- ասաց 21-ամյա Նարե Գեւորգյանը, որը պատրաստվում է թանգարաններ այցելել համակուրսեցիների հետ:

Այնուամենայնիվ, հավաստիացնենք, որ այցելողներ կշահեն (բայց ոչ հեռուստացույց կամ փոշեկուլ), իսկ չայցելողներին մաղթենք գոնե հաջորդ տարի «խելքի գալ»: