ԱՌԱՎՈՏ. Մարդիկ սկսում են ընդվզել

Երեկ ՀԱԿ-ի հանրահավաքի ժամանակ, որը նախապես հայտարարվածի համաձայն` կա'մ իշխանություն-ՀԱԿ երկխոսության մեկնարկի, կա'մ «ջրբաժանի» օր պիտի լիներ, Կոնգրեսի համակարգող Լեւոն Զուրաբյանը հայտարարեց, թե Հայաստանում թավշյա հեղափոխություն է սկսվել ու նաեւ համոզմունք հայտնեց, թե դրա վկայությունն է այն, որ եռամյա բռնաճնշումներից հետո Հայաստանի իշխանությունները ստիպված եղան գիտակցել, որ չեն կարող հաշվի չառնել ՀԱԿ-ին. «Այսինքն` ժողովուրդն անմիջապես իր ձեռքն է վերցնում երկրում ներքաղաքական գործընթացների կառավարումը», եւ «բոլորն ականատես են իրադարձությունների արագ զարգացման»:

Թերեւս ակնհայտ էր, որ այս հայտարարությունն, իհարկե, ուղղված էր հանրահավաքին ներկա վճռական քայլերի տրամադրվածությամբ քաղաքացիներին եթե ոչ մոլորեցնելու, ապա ոգեւորելու համար:

Այդուհանդերձ, երեկ «Առավոտի» հետ զրույցում Կոնգրեսի հանրահավաքի արդյունքներին անդրադառնալով, «Սարդարապատ» շարժման ներկայացուցիչ, ռեժիսոր Տիգրան Խզմալյանն ընդգծված սարկազմով ասաց, թե «մենք արդեն մի քանի ժամ է` ապրում ենք թավշյա հեղափոխության պայմաններում, քանի որ ապրիլի 28-ի ժամը 19-ից հետո հայտնի է դարձել, որ թավշյա հեղափոխություն է սկսվել»: