Հռոմի պապը խաղաղության ու հանդուրժողականության կոչ է արել

Հռոմի պապ Բենեդիկտոս 16-րդը Ս. Զատիկի կապակցությամբ հավատացյալներին ուղղված իր խոսքում եվրոպացիներին կոչ է արել համերաշխություն ցուցաբերել Հյուսիսային Աֆրիկայի իրադարձությունների հետեւանքով փախստական դարձածների նկատմամբ՝ իրենց պաշտպանության տակ առնելով նրանց. տեղեկացնում է CNN-ը:

Դիմելով Լիբիայի ժողովրդին` Հռոմի պապն ասել է. «Թող դիվանագիտությունն ու երկխոսությունը փոխարինեն բռնությանը»:

Նա անդրադարձել է նաեւ Ճապոնիային` «սփոփանք եւ հույս» հղելով երկրաշարժից, ցունամիից եւ միջուկային ճգնաժամից տուժած ճապոնացիներին: 

Հռոմի պապը նաեւ կոչ է արել քաղաքական գործիչներին` հարգել շարքային քաղաքացիների արժանապատվությունը, նաեւ միջոցներ ձեռնարկել  աղքատությունը հաղթահարելու ուղղությամբ: