ՀՐԱՊԱՐԱԿ. Ստիպել են դիմում գրել

Հրանտ Շահինյանի անվան մարմնամարզության դպրոցի տնօրեն Արմեն Սարիբեկյանը, ով մի քանի ամիս առաջ էր նշանակվել տնօրեն, երեկ հրաժարականի դիմում է գրել: Մեր տեղեկություններով` նրան կանչել եւ առաջարկել են դիմում գրել, ինչը վերջինս անխոս կատարել է:

Սարիբեկյանը հաստատեց, որ հեռանում է տնօրենի պաշտոնից, բայց չմանրամասնեց, թե ինչու:

«Ես ոչ մի պրետենզիա չունեմ, ես ինքս եմ ուզել, դիմում եմ գրել ու հեռացել եմ: Ինձ ոչ ոք չի կանչել ու չի ստիպել, իմ կամքով եմ հեռացել: Տնօրենի պաշտոնն ինձ դուր էր գալիս, աբսալյուտնը ոչ մի խնդիր չկար դպրոցում: Կոլեկտիվը հիանալի էր, մեկը մեկից լավ մարդիկ: Համենայն դեպս, էդ մի քանի ամսում, որ եղել եմ այնտեղ, մի բան դպրոցում հաստատ թողել եմ: Ես էլի սպորտի մեջ եմ, ֆեդերացիայի փոխնախագահն եմ: Ես սպորտից չեմ հեռանում»,- ասաց նա:

Իսկ հեռանալու պատճա՞ռը. «Պրոստը իմ անձնական խնդիրներն են: Ես ուրիշ բիզնես ունեմ եւ ավելի շատ ուզում եմ դրանով զբաղվել»:

Չնայած նախկին տնօրենը չգիտեր, թե ում են նշանակելու իր փոխարեն, սակայն մենք ճշտեցինք, որ պաշտոնակատար է նշանակվելու Կարեն Դանիելյանը, որը սպորտի հետ երբեւէ կապ չի ունեցել:

Ավելին, երեկ նա այցելել է սպորտդպրոց եւ աշխատողներին «զարմացրել» իր գիտելիքներով: Պարզվել է, որ մարմնամարզության դպրոցի տնօրենը գիմնաստիկան թեթեւ ատլետիկայից չի տարբերում: