Ազդարարվեց ՏՏ ոլորտի կառավարիչների այս տարվա մրցույթի մեկնարկը

Հայաստանի ՏՏ ոլորտի մենեջերների որակավորման բարձրացմանն ու մենեջմենտի կազմակերպման բարելավմանն ուղղված տեղեկատվական տեխնոլոգիաների ոլորտի կառավարիչների ամենամյա մրցանակաբաշխության համար ՎիվաՍել-ՄՏՍ ընկերությունն այս տարի հատկացրել է 19 մլն դրամ:

«Մեր ընկերությունը մեծ ուրախությամբ է սատարում այս ծրագրին, որովհետեւ շատ կարեւոր է, որ պատրաստենք մեր ապագայի տնօրեններին կամ մենեջերներին: Շատերը կարծում են, որ մենեջեր լինելը հրամանը ստորագրել ու կնքելն է, բայց իրականում այդպես չէ. աշխարհը զարգանում է, եւ կարող մենեջերը պետք է ունենա կառավարման եւ ղեկավարման բավականին մեծ ձիրքեր: Այս ծրագիրը հնարավորություն է տալիս ընտրել մի քանի տաղանդավոր երիտասարդների, որոնք Հայաստանում քիչ չեն, ուղարկել նրանց արտերկրում ուսանելու եւ ստացած փորձը փոխանցել ուրիշներին: Այսպես մենեջերների եւ տնօրենների գործը երկրում կզարգանա»,- այսօր հրավիրած մամուլի ասուլիսում նշել է ՎիվաՍել-ՄՏՍ ընկերության գլխավոր տնօրեն Ռալֆ Յիրիկյանը:

Այս տարվա մրցանակաբաշխության հաղթող 3 մենեջերները օգոստոսին 15-օրյա վերապատրաստման դասընթաց կանցնեն Սթենֆորդի համալսարանում:

Հիշեցնենք, որ յուրաքանչյուր տարեսկզբի ՀՀ կառավարության կողմից հայտարարվում է մրցույթ` ի հայտ բերելու ՏՏ ոլորտի ընկերություններում աշխատող լավագույն 3 մենեջերներին: