Մինսկի ահաբեկիչներին ձերբակալել են

Մինսկի «Օկտյաբրսկայա» մետրոյի կայարանում տեղի ունեցած ահաբեկչության գործով արդեն կան ձերբակալվածներ. հայտարարել է քննչական խմբի ղեկավար, Բելառուսի գլխավոր դատախազի տեղակալ Անդրեյ Շվեդը: 

БелааПан գործակալությանը Շվեդը հայտնել է, որ դեռ չի ճշտել` արդյո՞ք ձերբակալվածների մեջ են հենց կազմակերպիչները:

Ձերբակալությունները կատարվել են ականատեսների պատմածների հիման վրա Մինսկի միլիցիայի կողմից ստեղծված ֆոտոռոբոտների միջոցով: Առայժմ ոչ ոք իր վրա չի վերցրել ահաբեկչության պատասխանատվությունը:

Հիշեցնենք, որ ապրիլի 11-ին` ժամը 17:58-ին, Մինսկի «Օկտյաբրսկայա» մետրոյի կայարանում պայթուն էր որոտացել, որի արդյունքում զոհվել է 12 մարդ: Տուժել են 186 հոգի, որոնցից 157-ը հոսպիտալացվել են: Տուժածների մեջ կա նաև  Սամվել Սահակյան ազգանունով Հայաստանի քաղաքացի, ով գտնվում է հիվանդանոցում: