Թուրքիայի ԱԳՆ-ն բողոքում է արգենտինական դատարանի որոշման դեմ

Ինչպես տեղեկացրել էինք, անցած շաբաթ արգենտինյան դատարաններից մեկը ցեղասպանություն էր որակել 1915-1923-ին Օսմանյան կայսրության կողմից հայ բնակչության նկատմամբ իրականացված կոտորածներն ու բռնի տեղահանությունը: Դատարանը բավարարել էր հայազգի Գրիգորիո Հայրապետյանի հայցը, որը պահանջել էր տեղեկություններ հաղորդել Հայոց ցեղասպանությանը զոհ դարձած իր ծնողների եւ ազգականների ճակատագրին մասին։

Ըստ թուրքական «Հյուրիեթ» օրաթերթի` Թուրքիայի արտգործնախարարությունը հանդես է եկել արգենտինական դատարանի որոշումը դատապարտող հայտարարությամբ, որում, մասնավորապես, ասվում է, թե «նման զարգացումները չեն կարող ծառայել Թուրքիա-Հայաստան հարաբերությունների կարգավորմանը, թուրքերի և հայերի` անցյալը միասին գնահատելու ու երկու ժողովուրդների միջև եղած երբեմնի բարեկամությունը վերականգնելու ջանքերին»: