Քրիստոնյաներին Իրանում վատ են վերաբերվում

Քահանա Բեհրուզ Սադեհ Խաջանին եւ 4 իրանցի քրիստոնյաներ կկանգնեն իրանական դատարանի առջեւ:

Նրանք ձերբակալվել են 2010 թվականի հունիսին` իսլամին դավաճանելու, քաղաքական ցույցերի մասնակցելու, իսլամի օրենքները խախտելու, Աստծոն անարգելու մեղադրանքներով. տեղեկացնում են իրանական լրատվամիջոցները:

Շիրազի հեղափոխական դատարանը  իսլամական օրենքը խախտելու մեղադրանքով նրանց արդեն դատապարտել էր 1 տարվա ազատազրկման: Անազատության մեջ 8 ամիս մնալուց հետո քրիստոնյաներին գրավի դիմաց ազատ էին արձակել, սակայն հիմա էլ ցանկանում են դատել Աստծոն անարգելու համար:

«Քրիստոնյաների համաշխարհային համերաշխություն» կազմակերպությունը տեղեկացնում է, որ Իրանում քրիստոնյաներին վատ են վերաբերվում, եւ նրանցից շատերը հեռանում են երկրից: Կազմակերպությունը Իրանին կոչ է արել ապահովել իր քրիստոնյա քաղաքացիների դավանանքի ազատությունը:

Ի դեպ, քրիստոնյաները 67 մլն բնակչություն ունեցող Իրանում ընդամենը 300 հազար են, իսկ երկրի Սահմանադրության համաձայն` բոլոր օրենքները պետք է համապատասխանեն իսլամի չափանիշներին: