Պարսից ծոցի երկրներն ընդդեմ Իրանի

Պարսից ծոցի արաբական պետությունների համագործակցության խորհուրդը անհանգստություն է հայտնում Իրանի` դավադրությունների միջոցով կազմակերպության մասնակից երկրների ներքին գործերին միջամտելու կապակցությամբ. ասվում է խորհրդի հայտարարության մեջ:

Կազմակերպության անդամ երկրների` Սաուդյան Արաբիայի, Քուվեյթի, Բահրեյնի, Քաթարի, ԱՄԷ-ի եւ Օմանի արտգործնախարարները կիրակի երեկոյան Սաուդյան Արաբիայի մայրաքաղաք Էր Ռիադում խորհրդակցություն են անցկացրել եւ համատեղ հայտարարություն ընդունել:

«Իրանը տարածքաշրջանում ընդվզումներ եւ միջկրոնական բախումներ է հրահրում, այդպիսով` խախտվում են այդ երկրների ինքնիշխանությունը եւ մարդկանց իրավունքները, նաեւ խաթարվում են բարիդրացիության սկզբունքները, ՄԱԿ-ի եւ Իսլամական կոնֆերանս կազմակերպության կանոնակարգերը»,- ասվում է հայտարարության մեջ:

Նշվում է, որ Իրանի կողմից լրտեսային ցանցեր են ստեղծվել Քուվեյթում ու Բահրեյնում, ընդգծվում է, որ այդպիսով օրինական է Բահրեյնի Թագավորությունում կազմակերպության «Թերակզղու վահան» միացյալ զինված ուժերի ներկայությունը:

Հիշեցնենք,որ փետրվարից Բահրեյնում շիա ընդդիմությունը բազմահազարանոց ակցիաներ է իրականացնում` պահանջելով իրավունքների եւ ազդեցության ընդլայնում երկրում, որը ղեկավարում են փոքրամասնություն կազմող սուննի մահմեդականները: