Արյունալի ընդհարում` Թիկրիտում

Գրոհայինների հարձակման արդյունքում Սադամ Հուսեյնի հայրենի քաղաք Թիկրիտում զոհվել է 65 մարդ, մոտ 100-ը վիրավոր են. տեղեկացնում է «Ալ Ջազիրան»:

Ահաբեկիչներն անսպասելիորեն գրոհել են տեղի վարչական շենքը, գրավել այն եւ մոտ 5 ժամ պատանդ պահել այնտեղ գտնվող մարդկանց: Մինչ հարձակումը շենքի մոտակայքում հօդս են ցնդել երկու ականապատված ավտոմեքենաներ: Դիմակայությունը դադարել է այն բանից հետո, երբ հարձակվողներն իրենց պայթեցրել շենքում:

Զոհվածների թվում են տեղի վարչակազմի 3 ներկայացուցիչ, «Ալ Ջազիրայի» թղթակիցը, ոստիկանության պետը եւ նրա տեղակալը: Շատ են զոհերը ուժային կառույցների ներկայացուցիչների շարքերում, որոնք փորձել են ուժեղ կրակի տակ գրավել շենքը:

Բազմաթիվ զոհերով ընդհարումից հետո շատերն են սկսել կասկածել իրաքյան հատուկ ջոկատայինների պրոֆեսիոնալությանը: Հայտնի է, որ էլիտար ստորաբաժանման զինծառայողները Բաղդադից օդով բերվել են Թիկրիտ եւ, անտեսելով տեղի իշխանությունների` գրոհայինների հետ բանակցելու կոչերը, անմիջապես հարձակման են անցել: