Ողջագուրվել են, համբուրվել.... անձրեւ էր գալիս

«Երկու օր առաջ հանդիպել եմ Րաֆֆիին, ողջագուրվել ենք, գրկախառնվել, համբուրվել. անձրեւ էլ գալիս էր»,- ի պատասխան ԵՐԿԻՐ-ի հարցին` հանդիպե՞լ է Ազատության հրապարակում հացադուլ անող «Ժառանգության» առաջնորդին եւ ինչպե՞ս է գնահատում նրա քայլը, ասաց Հայաստանի մարքսիստական կուսակցության նախագահ Դավիթ Հակոբյանը:

Նա Րաֆֆի Հովհաննիսյանին խոհեմության հորդորներ է ուղղել, որ «խնայի իր առողջությունը ապագա քաղաքական գոտեմարտերի համար», իսկ գոտեմարտերից ամենակարեւորը Դ. Հակոբյանը համարում է քաղաքական երկրորդ ընդդիմադիր ճամբարի ձեւավորումը:

«ՀՀՇ-ական ընդդիմությունը չափից ավելի էգոիզմ է դրսեւորում, եւ 5-րդ դարի ինչ-որ կաթողիկոսի հռետորական աֆորիզմ մեջբերելով` Լեւոն Տեր-Պետրոսյանը փորձում է պարտակել իր քաղաքական անառակ պահվածքը»,- կարծիք հայտնեց մարքսիստը:

Ըստ նրա` վրիպում թույլ տալը, հետո էլ տերտերաբանությամբ դա քողարկելը, խոսում է այն մասին, որ այդ մարդուն երկրորդ անգամ գահ վստահել չի կարելի: Հացադուլի նստելը` որպես քաղաքական ըմբոստության նշան, մարքսիստի կարծիքով, պետք է հարգվի իշխանության կողմից` «դա է պահանջում քաղաքական մշակույթի կուլտուրան»: