Գիշերը պատգամավորները նորից ընդհարվել են ոստիկանների հետ

Մեր ոստիկանները հումանիստական որեւէ զգացմունք չունեն: Այս բանում համոզվել են «Ժառանգության» անդամները:

Այսօր լրագրողների հետ հանդիպման ժամանակ  ԱԺ «Ժառանգություն» խմբակցության ղեկավար Ստյոպա Սաֆարյանը պատմեց, որ այս գիշեր երկու թեթեւ ընդհարում է եղել իրենց կուսակցության անդամների եւ ոստիկանների միջեւ:

«Ժառանգության» անդամները ցանկացել են փոքրիկ վրան խփել, որպեսզի հացադուլ հայտարարած Րաֆֆի Հովհաննիսյանը կարողանա անհրաժեշտության դեպքում մի քիչ հանգստանալ այնտեղ, նաեւ պաշտպանվել սառը քամուց եւ ցրտից:

Սակայն ոստիկաններն արգելել են` տալով հետեւյալ զավեշտալի պատասխանը. «Սա երեխաների հրապարակ է»:

Լուսադեմին հավաքվածները, տեսնելով, որ Րաֆֆի Հովհաննիսյանի նստարանը բավականին կարճ է պառկելու համար, ցանկացել են ընդամենը ստուգել, թե հնարավո՞ր է կողքի նստարանը մոտեցնել դրան, թե այն ամրացված է գետնին:

Հենց այդ պահին ոստիկանները կայծակնային արագությամբ դուրս են եկել իրենց մեքենաներից եւ շրջապատել հավաքվածներին` ասելով, թե արգելված է նման բան անելը, եւ թե բոլորովին պետք է չէ իրենց հրահրել:

Ստյոպա Սաֆարյանն ասաց նաեւ, որ ոստիկանների հիմնական գործը հասարակական կարգը պահպանելը եւ քաղաքացիների անվտանգությունն ապահովելն է, սակայն երեկվա նրանց վարքագիծը դրա մասին չէր խոսում:

Պատգամավորը խնդրեց ոստիկանապետին` եթե այլ հրամաններ են տրվում ոստիկաններին, ապա այդ հրամաններից մեկական օրինակ նրանց «ծոցը դնել», որը կարողանան բացատրություն տալ, թե որ դեպքում ինչու են իրենց նման կերպ պահում: