ԵՄ-ն աջակցում է ԼՂ հակամարտության խաղաղ կարգավորմանը

ԵՄ-ն աջակցում է ԼՂ հակամարտության խաղաղ կարգավորմանը, որը հիմնված է լինելու ուժի չկիրառման, տարածքային ամբողջականության և ազգերի ինքնորոշման սկզբունքների վրա. Հայաստանի վարչապետ Տիգրան Սարգսյանի հետ համատեղ ասուլիսում ասել է Եվրահանձնաժողովի նախագահ Ժոզե Մանուել Բարոզոն։

«Մենք մտահոգված ենք տարածաշրջանում տեղի ունեցող բախումներով։ ԵՄ-ն աջակցում է ԵԱՀԿ Մինսկի խմբին և շարունակում է զարգացնել տարածաշրջանային գործունեությունը բարիդրացիական հարաբերությունների ‎համատեքստում»,- նշել է նա։

Ըստ Եվրահանձնաժողովի նախագահի` ԵՄ-ն աջակցում է նաեւ հայ-թուրքական հարաբերությունների բնականոնացմանը։ Հարցին, թե ինչպե՞ս է ԵՄ-ն վերաբերվում հարևան Հայաստանի հետ փակ սահման ունեցող Թուրքիայի` եվրաընտանիքի անդամ դառնալու նկրտումներին, Բարոզոն պատասխանել է. «Հաշվի առնելով տնտեսական շրջափակումը և փակ սահմանները երկու երկրների միջև` մենք, անշուշտ, քննարկում ենք Թուրքիայի հետ այդ հարցը։ Թուրքիան և Հայաստանը պետք է աշխատեն գործընկերության ոգով և երկխոսության միջոցով հաղթահարեն դժվարությունները»։

Եվրահանձնաժողովի նախագահը նաեւ անդրադարձել է ԵՄ-Հայաստան հարաբերություններին, նշել է, որ ԵՄ-ն ողջունում է Հայաստանի ջանքերը` ուղղված առևտուրն ավելի եռանդուն դարձնելուն, ինչպես նաև կառուցվածքային և վարչական կարողությունների ուժեղացմանը: Նա ընդգծել է, որ հարաբերություններն ավելի խորացնելու և ժողովրդավարական բարեփոխումներն առաջ տանելու անհրաժեշտություն կա, նաեւ տեղեկացրել է, որ սկսվելու են բանակցություններ Հայաստանի հետ վիզային ռեժիմի հեշտացման ուղղությամբ: