Ապրիլի 24-ը կնշվի նաեւ Թուրքիայում

Ինչպես նախորդ տարի, այս տարի եւս ապրիլի 24-ին Թուրքիայում կանցկացվեն Հայոց ցեղասպանության ոգեկոչման միջոցառումներ: Այս մասին այսօր տեղեկացրեց Բահչեշեհիր համալսարանի Եվրամիության ուսումնասիրության կենտրոնի ղեկավար, «Թըրքիշ դեյլի» եւ «Վաթան» թերթերի մեկնաբան Չենգիզ Աքթարը:

Ըստ նրա` նման միջոցառումներ տեղի կունենան 6 քաղաքներում, այդ թվում` Ստամբուլում եւ Անկարայում: Բացի այդ, առաջիկայում Ստամբուլում անցկացվելու են հայերին վերաբերող մի շարք այլ միջոցառումներ, մասնավորապես` կանցկացվի «Ադանայի կոտորածներ» խորագրով գիտաժողով:

«Կարծում եմ` ամենակարեւորը թուրք հասարակության հիշողության վերականգնումն է: Հավատացնում եմ` գյուղերում այդ գործընթացն ավելի արագ է տեղի ունենում, այնտեղ ավելի թարմ են հիշողությունները: Սա երկար գործընթաց է, սակայն պետք է փաստենք, որ սառույցը տեղից արդեն շարժվել է»,- ընդգծեց Չ. Աքթարը: