"Ժառանգությունը" չի պատրաստվում զրկվել իրեն բաժին հասած ռեսուրսներից

«Ժառանգությունն» իր մանդատները խորհրդարանում վայր դնելու մտադրություն չունի:

«Նման հայտարարություն կուսակցությունը չի տարածել, պարզապես լրագրողները ճիշտ չեն մեկնաբանել իրավիճակը», - այսօր հայտարարեց «Ժառանգություն» խմբակցության ղեկավար Ստյոպա Սաֆարյանը` նշելով, որ թեեւ խմբակցությունը փետրվարի 28-ին բոյկոտել է ԱԺ քառօրյա նիստերը, սակայն այսուհետ մասնակցելու է ԱԺ աշխատանքներին:

Ս. Սաֆարյանը եւս մեկ անգամ հիշեցրեց, որ «Ժառանգություն» կուսակցությունը մարտի 13-ին կանցկացնի կուսակցության վարչության եւ խմբակցության համատեղ նիստ, որի ընթացքում կքննարկվի կուսակցության հետագա մարտավարությունը: «Սակայն դա ոչ մի կապ չունի խորհրդարանում մեր մանդատները վայր դնելու հետ: Նորից եմ հայտարարում մենք նման մտադրություն չունենք եւ չենք զրկվի ԱԺ-ում մեզ բաժին հասած ռեսուրսներից»,- հայտարարեց պատգամավորը: