Թուրքական դատարանը մերժել է հայ համայնքի հայցը

Թուրքական դատարանը երեքշաբթի օրը մերժել է հայ համայնքի` Կ.Պոլսի հայոց նոր պատրիարք ընտրելու վերաբերյալ հայցը: Հայտարարվել է, որ դա ատյանի իրավասություններից դուրս է:

Նախաձեռնող խումբը, որը բաղկացած է հայ համայնքի պատասխանատուներից, չի ընդունում Ստամբուլի մարզպետարանի որոշումը, ըստ որի` ծանր հիվանդ Մեսրոպ արքեպիսկոպոս Մութաֆյանի փոխանորդ է նշանակվել Արամ արքեպիսկոպոս Աթեշյանը:

Արամ արքեպիսկոպոսն ասել է, որ քանի դեռ Մեսրոպ արքեպիսկոպոսը կենդանի է, նոր պատրիարքի ընտրություն չի լինի:  «Սա Հայ Առաքելական Սուրբ եկեղեցու օրենքն է: Ես ժամանակավորապես եմ միայն կատարում այդ պարտականությունները: Ովքեր ընդդիմանում են, ասեմ, որ դրանով լարվածություն ու անարգանք են ցուցաբերում, որը թուլացնում է պատրիարքությունը: Մարդիկ պետք է համբերատար լինեն»,- հորդորել է նա:

Ինչ վերաբերում է պատրիարքի առողջությանը, ըստ Աթեշյանի, բժիշկները հույս չեն տալիս. «Մեզ մնում է միայն սպասել հրաշքի»: