Դաշնակցությունը Քոչարյանի հետ հանդիպումներ չի ունենում

«Իշխանությունների հետ կապված մեր խնդիրը բովանդակային իշխանափոխություն իրականացնելն է, եւ թե իրենց կոալիցիայի ներսում ինչ քնննարկումներ տեղի կունենան, իրենց խնդիրն է»,- անդրադառնալով ԲՀԿ-ՀՀԿ խմորումներին` նշել է ՀՅԴ ներկայացուցիչ Արմեն Ռուստամյանը` կուլիսային խոսակցությունները մեկնաբանելը համարելով ոչ ճիշտ:

«Բարգավաճը դուրս կգա-դուրս չի գա, իր գործն է. կլինի, կտեսնենք: Ես որեւէ բան չեմ բացառում մեր երկրում, ընտրություններ են, եւ ընտրությունների շեմին ամեն տեսակ տեխնոլոգիաներ կարող են կիրառվել»,- ասել է Ռուստամյանն` ընդգծելով, որ Դաշնակցությունը միշտ ունեցել է իր ինքնուրույնությունն ու ուղեգիծը, մասնավորապես` ազգային կարեւորագույն հարցերում:

«Էն, ինչ մենք հիմա ասում ենք, անցյալում էլ ենք ասել, եւ եթե երկու անգամ մենք պաշտպանել ենք Ռոբերտ Քոչարյանին, չենք պաշտպանել հենց այնպես, պաշտպանել ենք` հստակ խնդիրներ դնելով, եւ այդ խնդիրների զգալի մասը մտել է կոալիցիոն հուշագրի մեջ: Հաճախ եղել են դեպքեր, երբ հուշագրերի կետին մեր մատը դնելով` ասել ենք` եթե այս կետը չի բավարարվում, մենք դուրս ենք գալիս կոալիցիայից: Այսօր, եթե համամասնական-մեծամասնականը փոխվեց` 70-30 տոկոս դարձավ, այն պատճառով էր, որ մենք ասացինք` եթե դա չի լինի, մենք դուրս կգանք կոալիցիայից»,- նկատեց ՀՅԴ անդամը` լրագրողների հարցին ի պատասխան ասելով, որ Դաշնակցությունն այսօր Քոչարյանի հետ հանդիպումներ չի ունենում. «Քոչարյանն իր կյանքով է ապրում, մենք` մեր»:

Լրագրողները նաեւ հետաքրքրվեցին` արդյո՞ք Քոչարյանի վերջին հարցազրույցը չի խոսում Քոչարյան-Սերժ Սարգսյան հակասության մասին: «Հակասությունը կա'մ դրսեւորվում է, կա'մ չի դրսեւորվում, ժամանակը ցույց կտա: Տարին նախընտրական է, եւ նման հայտարարությունները թող ձեզ չզարմացնեն: Անսպասելի բաներ դեռ շատ կլսենք, այս ամենի նպատակը յուրաքանչյուրի համար ընտրություններում իր շանսերը մեծացնելն է»,- ասել է Արմեն Ռուստամյանը: