Հրաբուխը սպառնում է Ճապոնիային

Ճապոնական Կյուսյու կղզում արդեն քանի օր է` մոլեգնում է Սինմոե հրաբուխը: Վերջին 52 տարում քուն մտած «հրեշը» սկսել է ժայթքել ու դուրս է նետել մոխրի ու ծխի երեք կիլոմետրանոց մի սյուն: 500 ընտանիք կամ 1,1 հազար մարդ ստիպված են եղել գիշերն անցկացնել էվակուացիոն կետում:

Օդերեւութաբանական վարչության գնահատումներով` հրաբխի խառնարանում լավայի գմբեթն արդեն 500 մետր պարագիծ ունի: Հրաբխից 50 կմ հեռավորության վրա գտնվող քաղաքների վրա թափվող հրաբխային մոխրի պատճառով անցած շաբաթ հետաձգվել են ավիաչվերթները, դադարեցվել է ավտո- եւ երկաթուղային երթեւեկությունը:

Մասնագետներն առայժմ չեն կարող ասել, թե որքան կտեւի լեռան ակտիվությունը. VIII դարի սկզբին Սինմոեն մեկուկես տարի շարունակ մոխիր էր լցնում շրջակա քաղաքների վրա: