Չկա ոչ մի օրենք, որ նահանգներին կարգելեր ցեղասպանություն տերմինն օգտագործել

Սան Ֆրանցիսկոյում տեղակայված ԱՄՆ 9-րդ շրջանի դաշնային վերաքննիչ դատարանը, վերանայել է իր անցած տարվա որոշումը և այժմ ասում է, որ թուրքական օսմանյան կայսրությունում սպանված հայերի ժառանգները իրենց ազգականներին կյանքի ապահովագրություն վաճառած ընկերություններից կարող են վճարում պահանջել, տեղեկացնում է Dailynews-ը:

Վերաքննիչ դատարանն ասել է, որ 1915 թ.-ի դեպքերը «ցեղասպանություն» անվանող Կալիֆորնիայի օրենքը չի հակասում ԱՄՆ արտաքին քաղաքականությանը, որը դեռ անորոշ է այս հարցով:

Անցած տարի նույն դատարանը որոշել էր, որ Կալիֆորնիայի կողմից դեպքերը «ցեղասպանություն» անվանելը հակասում է ԱՄՆ արտաքին քաղաքականությանը, սակայն երեկ դատավոր Դորոթի Նելսոնն փոխել է իր միտքը և համաձայնել դատավոր Հարի Փրեգերսոնի հետ, որը որոշման մեջ գրել էր. «Մենք եկանք այն եզրակացության, որ ոչ մի դաշնային օրենք չկա, որը նահանգներին արգելում է «Հայոց ցեղասպանություն» տերմինն օգտագործել»:

«Սա մեծ հաղթանակ է հայ ժողովրդի համար»,- ասել է հայերի ժառանգներին ներկայացնող փաստաբան Բրայան Կաբատեքը: