Ամանորյա ուղերձ. Եգիպտոս մեկնելիս զգուշացեք... շնաձկներից

Եթե պատրաստվում եք Նոր տարվա տոներն անցկացնել Եգիպտոսում, ապա, որքան էլ որ զարմանալի հնչի այս խորհուրդը, զգուշացեք շնաձկներից:

Եգիպտոսում վերջին շրջանում շնաձկների ակտիվություն է գրանցվում, որի արդյունքում զբոսաշրջիկներից մեկը մահացել է, իսկ մի քանիսը՝ վիրավորվել:

Երեկ Շարմ-Էլ-Շեյխի ջրերում շնաձկան հարձակումից գերմանացի կին է մահացել: Այս դեպքից հետո Եգիպտոսի տուրիզմի նախարարությունը ստիպված փակել է լողափը: 

Նման դեպքեր են տեղի ունեցել նաև նոյեմբերի 30-ից դեկտեմբերի 1-ն ընկած ժամանակահատվածում, երբ երկու ռուս կին և մեկ ուկրաինացի տղամարդ է վիրավորվել: Նրանցից մեկի վիճակը ծանր է:

Միացյալ Թագավորության արտաքին գործերի գրասենյակն իր պաշտոնական կայքում զգուշացրել է իր քաղաքացիներին զգույշ լինել Կարմիր ծովի ջրերում:  

Մարդակեր ձկան որոնումները շարունակվում են: Արդեն ոչնչացվել է երկու շնաձուկ, սակայն նրանցից և ոչ մեկը նման չի եղել «ամբաստանյալ» շնաձկանը: