Էներգետիկ հրադադարի ուղղությամբ աշխատանքները շարունակվում են. Պեսկով

Ռուսաստանի նախագահի մամուլի քարտուղար Դմիտրի Պեսկովը հայտարարել է, որ էներգետիկ հրադադարի ուղղությամբ աշխատանքները շարունակվում են։

Ինչպես հաղորդում է ՏԱՍՍ գործակալությունը, ավելի վաղ Ռուսաստանի պաշտպանության նախարարությունը հրապարակել էր Ուկրաինայում գիշերն իրականացրած թիրախների ցանկը։

Այն ներառում էր նաև էլեկտրակայաններ։

Այս ֆոնին Պեսկովին հարցրել են՝ արդյոք դա նշանակում է, որ ԱՄՆ-ի կողմից քննարկված էներգետիկ հրադադարն անընդունելի է Ռուսաստանի համար։

«Ինչի՞ մասին է հայտարարվել։ Ո՞րն էր էներգետիկ հրադադարի պարագիծը, և ի՞նչ է դա նշանակում։ Արդյո՞ք այն նշված էր»,- հարցրել է Կրեմլի խոսնակը։

Բացասական պատասխան ստանալով՝ նա հաստատել է.

«Դուք միանգամայն ճիշտ եք։ Հետևաբար, այս ուղղությամբ աշխատանքները շարունակվում են»։

Խոսնակը նաև նշել է, որ օրակարգում ռուս-ուկրաինական կարգավորման շուրջ համաձայնեցված միջազգային հանդիպումներ չկան։