Սոչիի օդանավակայանում հետաձգված է ութ չվերթ․ դրանց թվում՝ Երևան մեկնող և Երևանից ժամանող չվերթները

Սոչիի օդանավակայանում ութ չվերթ հետաձգվել է (ավելի քան երկու ժամ)՝ ավիաընկերությունների արտադրական պատճառներով, սակայն օդանավակայանը շարունակում է գործել սովորական ռեժիմով, հայտնում է «ՌԻԱ Նովոստի»-ն՝ հղում անելով Սոչիի օդանավակայանի մամուլի ծառայությանը։

«Սոչիի օդանավակայանը և բոլոր ծառայությունները գործում են սովորական ռեժիմով։ Հետաձգված չվերթների (ավելի քան 2 ժամ) քանակը՝ 8 է, որոնք այս պահին կապված են ավիաընկերությունների արտադրական պատճառների հետ», – նշված է հաղորդագրությունում։

Օդանավակայանի առցանց ցուցատախտակի տվյալներով՝ այս պահին հետաձգվել են Սոչիից մեկնող չվերթները դեպի Նովոսիբիրսկ, Մոսկվա, Անթալիա (Թուրքիա), Երևան (Հայաստան), Բաթումի (Վրաստան)։ Հետաձգվել են նաև Սոչի ժամանող չվերթները Մոսկվայից, Նովոսիբիրսկից, Թբիլիսիից (Վրաստան), Երևանից (Հայաստան), Անթալիայից (Թուրքիա) և Բաթումիից (Վրաստան)։