Պարոն Խուդաթյան, մտածեք նոր խոսեք, Սահմանադրության ու օրենքների խախտումը ձեզ համար դարձել է գործելաոճ․ Արմենուհի Կյուրեղյան

ԱԺ-ում «Հայաստան» խմբակցության պատգամավոր Արմենուհի Կյուրեղյանի ելույթը․

 Սիրելի հայրենակիցներ, քաղաքական մեծամասնությունը ցույց է տալիս հերթական արհամարհական վերաբերմունքը միջազգային վավերացրած փաստաթղթի, Սահմանադրության և օրենսդրական պահանջների կատարմանը:

Տեղական ինքնակառավարման եվրոպական խարտիա

Հոդված 5

Տեղական ինքնակառավարման մարմինների տարածքային սահմանազատումների ցանկացած փոփոխություն չպետք է կատարվի առանց նախապես քննարկելու տեղական շահագրգիռ համայնքների հետ, նաև հանրաքվե անցկացնելու միջոցով:

ՀՀ Սահմանադրություն

Հոդված 190

Հանրային շահերից ելնելով՝ համայնքները կարող են օրենքով միավորվել կամ բաժանվել։ Ազգային ժողովը համապատասխան օրենք ընդունելիս պարտավոր է լսել այդ համայնքների կարծիքը։

Պ-ն Խուդաթյան, ինչքան էլ ստեղից, ընդեղից նկարներ ցույց տաք, խարտիայի և սահմանադրության պահանջները չեն կատարվել, ԱԺ-ն չի լսել համայնքների կարծիքը, բայց պարտավոր էր: Այդ նկարները ցույց տալով ուզում եք ապացուցել, որ ԱԺ-ն, այսինքն՝ մենք, լսել ե՞նք համայնքների կարծիքը:

Մտածե՛ք, էլի՞, ինչ-որ բան ասելուց առաջ:

Սահմանադրության և օրենքների

խախտումը վաղուց արդեն ձեզ համար դարձել է գործելաոճ, օրենսդիր, գործադիր և դատական իշխանությունների բաժանման, հավասարակշռման սկզբունքը  վաղուց արդեն ձեզ համար սահմանադրական նորմ չի:

Այս կերպ ե՞ք սկսել ՀՀ-ի՝ ԵՄ անդամակցելու  գործընթացի մեկնարկը, որն այդպես մեծ աղմուկով, օրենքով հայտարարեցիք:

Չէ որ Կոպենհագենյան չափանիշները պահանջում են ժողովրդավարական կառավարում, օրենքի գերակայություն, ԵՄ պարտավորությունների կատարում:

Հիմա ինձ մոտ հռետորական հարցեր են առաջանում.

• Այդ ի՞նչ են խոստացել ձեզ, որ այդքան հետևողականորեն խախտում եք խարտիան, ՀՀ սահմանադրությունը, օրենքները
• ինչի՞ց և ումի՞ց եք վախենում, և որ այդ վախերն ավելի մեծ են, քան սահմանադրությունը խախտելու համար պատժվելու վախը:
• Ի՞նչ եք խոստացել, ինչի՞ դիմաց և ու՞մ, որ այդպես համառորեն խախտելով օրենքները, ձեր համար վերընտրվելու հիմքեր եք ստեղծում:

Հարցեր արդեն ԵՄ երկրներին, դեսպաններին, ԵՄ անդամակցելուն ջատագովող ՀԿ-երին.

Ինչու՞ եք այդքան հանդուրժում ժողովրդավարական նորմերի այսքան ոտնահարումը,  ինչո՞ւ համարժեք արձագանք չեք տալիս, երբ ոտնահարվում են  վավերացրած փաստաթղթերը, սահմանադրությունը, օրենքները:

Ի՞նչ եք փոխարենը ակնկալում, ի՞նչ հույսեր ունեք այս իշխանություններից:

Սրանք հարցեր են, որոնց պատասխանները վաղ թե ուշ հանրությունը պահանջելու ու ստանալու է: