Դա ուկրաինացի ժողովրդի սեփականությունն է. Զելենսկին՝ Թրամփի խոսքերի մասին, որ Ղրիմը «մնալու է ՌԴ կազմում»

Ուկրաինայի նախագահ Վլադիմիր Զելենսկին հայտարարել է, որ Ղրիմը կմնա Ուկրաինայի ժամանակավորապես օկուպացված տարածք։ Այս մասին նա լրագրողներին ասել է՝ ծաղիկներ դնելով Կիևի Սվյատոշինսկի շրջանում ռուսական հարվածի հետևանքով ավերված բնակելի շենքի մոտ, հաղորդում է ՌԲԿ-Ուկրաինան։

«Մեր դիրքորոշումը չի կարող հակասել Ուկրաինայի Սահմանադրությանը։ Մենք չենք կարող ինչ-որ բան տալ կամ չտալ։ Սա մեր սեփականությունն է, ոչ թե իմը, սա ուկրաինացի ժողովրդի սեփականությունն է։ Ժամանակավորապես օկուպացված տարածքները, ցավոք, ժամանակավորապես օկուպացված են», - ասաց Ուկրաինայի նախագահը։

Նա հավելեց, որ Ղրիմում հանրաքվեն տեղի է ունեցել «զենքի սպառնալիքով», և դրա արդյունքները «ոչ ոք չի ճանաչի»։

Զելենսկին համաձայնել է, որ Ուկրաինան ներկայումս բավարար զենք չունի Ղրիմը վերադարձնելու համար։

«Ես համաձայն եմ նրա [Դոնալդ Թրամփի] հետ, որ մենք այսօր բավարար զենք չունենք, զենք, ոչ թե մարդիկ… Ասել, որ մենք բանակ չունենք, ճիշտ չէ։ Ես համաձայն եմ, որ Ուկրաինան բավարար զենք չունի Ղրիմի վրա զենքի ուժով վերահսկողությունը վերականգնելու համար», - ասաց նա։

Նախագահը հավելեց, որ տարածքային հարցերի քննարկումները պետք է տեղի ունենան միայն լիակատար հրադադարից հետո։ Աշխարհն ունի պատժամիջոցներ, տնտեսական և դիվանագիտական ​​հնարավորություններ դրա համար։

«Այսպիսին է մեր տեսլական է ԱՄՆ առաջարկների վերաբերյալ։ Մենք պատասխանում ենք, որ լիակատար, անվերապահ հրադադարը հնարավորություն է տալիս խոսել ամեն ինչի մասին։ Մենք պատրաստ ենք երկխոսության ցանկացած ձևաչափով, այս ձևաչափով ցանկացածի հետ, ցանկացած պահի, բայց միայն այն բանից հետո, երբ իրական ազդանշան լինի, որ Ռուսաստանը պատրաստ է դադարեցնել պատերազմը։ Նման ազդանշանը լիակատար, անվերապահ հրադադարն է», - եզրափակեց Զելենսկին։

ԱՄՆ նախագահ Դոնալդ Թրամփը Time ամսագրին տված հարցազրույցում հայտարարել է, որ Ղրիմը կմնա Ռուսաստանի վերահսկողության տակ նույնիսկ ռուս-ուկրաինական պատերազմի ավարտից հետո։ «Մենք ստիպված ենք խոսել Ղրիմի մասին, քանի որ այն անընդհատ հիշատակվում է։ Ղրիմը կմնա Ռուսաստանի կազմում։ Եվ Ուկրաինայի նախագահ Վլադիմիր Զելենսկին հասկանում է սա, և բոլորը հասկանում են սա, որ Ղրիմը երկար ժամանակ Ռուսաստանի կազմում է եղել», - ասաց Թրամփը։