Ծախել եք Արցախը, թալանել եք իմ երկիրս, էսօր թալանչիությունի՞ց եք խոսում․ արցախցի

Արցախցիների իրավունքների պաշտպանության խորհուրդը բողոքի ակցիա իրականացրեց Գլխավոր դատախազության շենքի դիմաց, նրանք պահանջեցին բացատրություն տալ արցախցիների դեմ ատելություն քարոզելու դեպքերի և Արցախում կոռուպցիոն երևույթների վերաբերյալ հաղորդումների հիմքով իրականացվող քրեական վարույթների ընթացքի մասին:
 

«Մարտադաշտում չի եղել հայաստանցի, արցախցի, եղել է հայ ազգ։ Այն մարդիկ, ովքեր տարանջատում են մտցնում, թշնամի, վտանգավոր մարդիկ են մեր ազգի համար»,- իր ելույթում ասաց «Վերածնվող Արցախ» շարժման ղեկավար Անաստաս Իսրայելյանը։ «Դատախազության աշխատանքը պետք է ուղղված լինի նման մարդկանց պատասխանատվության ենթարկելուն։ Հստակ աշխատանք է տարվում այդ պառակտումը մտցնելու համար։ Պետական մակարդակով ևս ատելություն են սերմանում՝ արցախցիներին պիտակավորելով որպես թալանչիներ։ Թալանչի հա թալանչի, հստակ անուններ տվեք, թե ովքեր են այդ թալանչիները»,- ասաց Իսրայելյանը՝ նշելով, որ երբ խոսում են խնդրիների մասին, իրենց ասում են՝ գնացեք ձեր թալանչիներից ուզեք։