Իշխանությունը հույսը չի կորցնում. Փաշինյանն աշխատում է պառակտել ընդդիմությանը Գյումրիում. «Ժողովուրդ»

«Ժողովուրդ» օրաթերթը գրում է.

«Իշխանությունները դեռ հույսները չեն կտրում, որ ինչ-որ բան կպատահի, ու ապրիլի 16-ին ընդդիմադիրները Վարդան Ղուկասյանին չեն կարողանա ընտրել Գյումրու քաղաքապետի պաշտոնում:

«Ժողովուրդ» օրաթերթի՝ Կառավարությանը մոտ կանգնած աղբյուրները փոխանցում են, որ Նիկոլ Փաշինյանը, կարծես թե, այդ ուղղությամբ «աշխատում» է տարբեր բանագնացների միջոցով ու թիմակիցներից գաղտնի է պահում, որպեսզի հասկանա՝ կարող է գործը գլուխ բերել, նոր հայտարարի դրա մասին: Ու դա է եղել պատճառը, որ նախօրեին ՔՊ վարչության նիստին կրկին կանչել է Շիրակի մարզպետ Դավիթ Առուշանյանին ու ՔՊ Գյումրու քաղաքապետի թեկնածու Սարիկ Մինասյանին՝ հասկանալու համար, թե ինչ տրամադրություններ են մարզում ու ինչ կարելի է անել, որ իշխանափոխություն Գյումրիում չսկսվի, իհարկե՝ նաեւ մեղադրելով թիմակիցներին ավագանու ընտրություններում պարտվելու համար:

Մեր աղբյուրները փոխանցում են, որ ՔՊ-ականները սպասում են, որ հնարավոր է Փաշինյանին հաջողվի ընդդիմադիրներին պառակտել ու տապալել Գյումրու քաղաքապետի պաշտոնում Վարդան Ղուկասյանի ընտրվելը: Եթե չընտրեն, նշանակում է՝ կհաղթի ՔՊ-ն: Բայց ընդդիմադիրներն էլ հայտարարում են, որ իրենք թույլ չեն տալու ՔՊ-ին Գյումրիում իշխանություն ունենալ:

Ի դեպ, երեկ ողջ օրը փորձեցինք կապ հաստատել Դավիթ Առուշանյանի ու Սարիկ Մինասյանի հետ, սակայն՝ ապարդյուն, նրանք հեռախոսազանգերին չեն պատասխանում: Չկարողացանք պարզել, թե ով է Փաշինյանից ՍՄՍ ստացել՝ պաշտոնից հեռանալու եւ ՔՊ-ին մոռանալու մասին»։

Հոդվածն ամբողջությամբ կարող եք կարդալ  «Ժողովուրդ»   թերթի՝ 10․ 04․ 25 թ համարում։