Ադրբեջանը կրկին մեղադրում է ՀՀ զինված ուժերին. ՊՆ-ն լռում է

Ադրբեջանը փոքր դադարից հետո մարտի 30-ին դարձյալ ապատեղեկատվություն է տարածել և ՀՀ զինված ուժերին մեղադրել «հրադադարի ռեժիմը խախտելու համար»՝ հայտարարելով, թե «ՀՀ զինված ուժերի ստորաբաժանումների կողմից մի քանի անգամ՝ դադարներով, հրաձգային զենքից թիրախավորվել են Գորիսի, Վարդենիսի և Ճամբարակի ուղղությամբ տեղակայված ադրբեջանական դիրքերը»:

Ավելին, Ադրբեջանի պաշտպանության նախարարության տարածած հաղորդագրության մեջ նշվում է, թե իբր «մարտի 29-ի երեկոյան և մարտի 30-ի առավոտյան Կոռնիձորի հատվածում ադրբեջանական դիրքերի «վրայով» հայկական զինված ուժերը 3 անգամ փորձել են հետախուզական թռիչքներ իրականացնել անօդաչու սարքերի կիրառմամբ»:

Այսինքն, Ադրբեջանը չի դադարում հնարավոր սադրանքների կամ էսկալացիայի «հիմքեր» գտնել՝ պատասխանատվությունը դնելով հայկական կողմի վրա:

Նշենք, որ նման տեղեկություններին ՀՀ ՊՆ-ն որպես կանոն արագ է արձագանքում` րոպեների ընթացքում, հարկ եղած դեպքում` օրը մի քանի անգամ, բայց այսօր արդեն անցել է մոտ երեք ժամ, իսկ ՀՀ ՊՆ-ն լռում է:

Արդյունքում` ադրբեջանական տելեգրամյան ալիքներում արդեն քաղաքական վերլուծություններ են արվում ու հայկական կողմին մեղադրում իրավիճակն ապակայունացնելու փորձի մեջ, նաեւ չեն բացառում, որ Փաշինյանն այսպիով փորձի հայ հասարակության ուշադրությունը շեղի ներքաղաքական իրադարձություններից: