Թուրքիայում երկրորդ գիշերն անընդմեջ բողոքի ցույցեր են տեղի ունենում՝ կապված Ստամբուլի քաղաքապետի կալանավորման հետ

Ստամբուլի քաղաքապետ Էքրեմ Իմամօղլուի ձերբակալությունից հետո  հազարավոր մարդիկ մասնակցել են Անկարայում, Ստամբուլում և Թուրքիայի մի շարք այլ քաղաքներում անցկացվող բողոքի ցույցերին։

Բողոքի ցույցերին մասնակցել է նաև Անկարայի քաղաքապետը, որը հայտարարել է, որ ընդդիմադիր կուսակցությունները պետք է միավորեն ուժերը «անարդարության դեմ»։

Թուրքիայի ներքին գործերի նախարարը կոչ է արել երկրի քաղաքացիներին պահպանել կարգուկանոնը։ Նա հայտնել է, որ գիշերը տեղի ունեցած բախումների ժամանակ տուժել է 16 ոստիկան, իսկ 53 անձ բերման է ենթարկվել և մեղադրվում է հասարակական կարգը խախտելու մեջ։ 

Հիշեցնենք՝ Թուրքիայում բողոքի ցույցերը սկսվել են այն բանից հետո, երբ մարտի 19-ին իրավապահները ձերբակալել են Ստամբուլի քաղաքապետ Էքրեմ Իմամօղլուին հակակոռուպցիոն հետաքննության շրջանակներում։ Դատախազությունը նշել է, որ Իմամօղլուի և մի քանի գործարարների հետ կապված ապօրինի ֆինանսավորման դեպքեր են հայտնաբերել։