Իսրայելի ռազմաօդային ուժերը հարվածներ են հասցրել Գազայում գտնվող ՄԱԿ-ի շենքին

Իսրայելի ռազմաօդային ուժերը հարվածներ են հասցրել Գազայի հատվածում գտնվող ՄԱԿ-ի շենքին, ինչի հետևանքով զոհվել է մեկ օտարերկրյա աշխատող և վիրավորվել առնվազն չորսը, հայտնում է Գազայի առողջապահության նախարարությունը:

«ՄԱԿ-ի կառույցներում աշխատող հինգ օտարերկրյա աշխատակից վիրավորվել է օկուպացիոն ուժերի կողմից կենտրոնական նահանգում գտնվող շտաբի հրետակոծության հետևանքով, նրանցից մեկը մահացել է հիվանդանոց ժամանելուն պես», - ասվում է Առողջապահության նախարարության հաղորդագրության մեջ։

Հիշեցնենք՝ Իսրայելի պաշտպանության բանակը վերսկսել է հարվածները Գազայի հատվածին։ Իսրայելի վարչապետ Բենիամին Նեթանյահուն ասել է, որ հարձակումները շարունակվում են, քանի որ ՀԱՄԱՍ-ը հրաժարվել է ընդունել հրադադարը երկարաձգելու և պատանդներին ազատելու ԱՄՆ-ի ծրագիրը: Պաղեստինյան ՀԱՄԱՍ-ի քաղբյուրոյի անդամ Իզզաթ ալ-Ռիշքն ասել է, որ Նեթանյահուի որոշումը՝ վերադառնալ պատերազմ, նշանակում է մահապատիժ Գազայի հատվածում իսրայելցի պատանդների համար: