Թրամփը Վաշինգտոնում ավիավթարի մեջ մեղադրել է նախկին վարչակազմին

ԱՄՆ մայրաքաղաք Վաշինգտոնում ուղևորատար ինքնաթիռի և ռազմական ուղղաթիռի բախումից հետո գտել են սև արկղերը։ Պոտոմակ գետից, ուր ընկել էին օդանավերը, դուրս է բերվել 40 մարդու մարմին։ CNN-ը հաղորդում է, որ հունվարի 29-ի գիշերը օդանավերի բախման պահին երկու կարգավարի փոխարեն աշխատել է մեկը։

ԱՄՆ նախագահ Դոնալդ Թրամփը քննադատել է իր նախորդ Ջո Բայդենի վարչակազմին՝ նշելով, որ բազմազանության և ներառականության հետ կապված նախաձեռնությունները հանգեցրել են ավիացիայի ոլորտում մեղմ չափանիշների։ Նա նշել է, որ նախագահ Բարաք Օբամայից հետո ստանձնելով նախագահի պաշտոնը՝ փոխել էր ոլորտում ընդգրկվելու չափանիշները։

ԱՄՆ տրանսպորտի անվտանգության ազգային խորհուրդը հայտնել է, որ ավիավթարի պատճառների հետաքննության վերաբերյալ նախնական զեկույցը կհրապարակվի 30 օրվա ընթացքում։ Սև արկղերը կուղարկվեն գերատեսչության լաբորատորիա՝ վերլուծության։ 

Կանզասի Վիչիտա քաղաքից չվերթ իրականացնող ուղևորատար ինքնաթիռում գտնվում էր 60 ուղևոր և անձնակազմի 4 անդամ, իսկ ուսումնական թռիչք իրականացնող ռազմական ուղղաթիռում՝ 3 զինվոր։ Դոնալդ Թրամփը հաստատել է՝ ոչ ոք ողջ չի մնացել։